حان الوقت انكم تتعرفو علي احمد الرميلي اكتر

يالا يا شباب بناءا علي اختياركم انا جاهز للي عاوز يسألني اي اسئلة وانشاء الله ارد عليها بكل صراحة علشان انا مش بخاف من حدة غير اللي خلقني

انا جاهز

ايه يا شباب محدش عاوز يسالني في حاجة انا وقتي بفلوس

ازيك يا احمد ؟ والله مشغوله وغصب عنى

الحمد لله يا منة انا كويس وعذرك مقبول ويارب يكون انشغالك عنا ده خير يارب واحنا نتمنالك الخير

اما بقيت نا س فحظك انى اسبوعك اغلب الى فى المنتدى مسافرين
زى ما بيقولوا ما شيه معاك حلاوة يا عم

ولا يهمك يا ريس هسمحلهم يسالولني بعد مكا يرجعم بالسلامة عادي انا ديمقراطي

اما اسئلتى فانا والله محتارة اسئلك ايه لانى بردة لسه معرفكش يا احمد

شخصيتك الى باينه قدام الجميع عجبانى

انا الحمد لله يا منة مش بوشين ويارب دايما افضل كدة ادام الجميع ودي شهادة اعتز بيها
ومحتارة ليه مش قلتلك حضري ورقة وقلم من زمان واساليني
عالعموم كل اسئلتك انشاء الله هجاوب عليها كلها وبصراحة لاني مش بخاف من اي حد
ومستني باقي اسئلتك
واسألي لاننا بنسال بعض علشان نتعرف علي بعض اكتر فانا قدامك اهوة اتعرفي عليا براحتك

لو هسالك هقولك ايه هى العيوب الى شفتها فى منه فى الفترة الصغيرة دى؟

ماشي انت بداتي سخنة بس عادي

العيوب اللي شفتها في منة الفترة البسيطة جدا دي
انها بتحكم علي الناس من خلال الكلام مش الطباع ولا المعاشرة
بتحكم عالناس بالظاهر
طيبة ودي ميزة وعيب العيب اللي فيها من الطيبة انها بتسمع كلام اي حد بتثق فيه وبتعمله من غير ما تدور وراه فده ممكن يوقعها في مشاكل

وليه فجاة قررت انك تنضم معانا فى المكتب لا وكمان قررت تكون المقرر العام منغير ما تكون واحد مننا؟

اولا انا ما قررتش فجأة انضم لاني كنت باجي المكتب من 2007 من اول ما استاذ محمود كان معانا في امانة الشباب بس المشكلة ان مواعيد المكتب كانت بتتضارب معايا خالص في مواعيد محاضراتي فمكنتش بعرف اجي خالص فكنت بجي علي فترات متباعدة وكمان شغلي ونشاطي فالمعهد كان شاغلني شوية وكمان ان الشخصياتن اللي فالمكتب كانت تعتبر غريبة عني فكنت بحس بالغربة
وبعدين في 2008 جيت من بعد الانتخابات ومسكت لجنة العلاقات العامة فالاخر وكنت بجي برضه كل اسبوعين تلاتة لان برضه انا كنت بحضر تمهيدي ما جستير والمحاضرات بتتضارب معايا بس كتير كنت باجي وخصوصا لما يبقي في شغل مطلوب مني بس المكتب الوقت ده مكنش شغال حلو برضه فمكنش بيشجع وجهزت شغل كتير بس اتأخرت فيه علشان امتحانتي وان المكتب مكنش شغال وجيت انزله لقيت الانتخابات قربت قلت هيتقال عليا اني بعمل دعياة لنفسي فمردتش انزله ودلوقتي انا شغال فيه بس كنت بشتغل في لجنتي وجبت ناس كتير للمكتب وده اللي خلي شوية الجو ما يبقاش غريب عليا
والحمد لله انا دلوقتي موجود معاكم ومبسوط جدا اني معاكم
ده بالنسبة لاني جيت المكتب وممكن اكون غريب عنكم شوية بس في ناس تعرفني واتعاملت معايا في حاجات تانية برة زي الحزب ومشروع استثمار طاقات الشباب وانت اتعاملتي معايا فيه ممكن فترة بسيطة بس اتعاملتي معايا
بس المكتب فالاول والاخر انا حبيته من كلام استاذ محمود وشريف عنه ومن الكلام اللي كنت بسمعه عنه من زمان واللي لما انضميت مالاقيتش حاجة من كتير واكيد انت فاهماني

اما بالنسبة لاني قررت اكون المقرر وانا مش واحد منكم
فانا مش معاكي

انا مش معاكي يا منة لانني ممكن مكنش واحد من شلتك انت بس لازم تعرفي ان كان في ناس معاكي انت وعاوزاني انا اكون المقرر
وعلي فكرة انا مقررتش اني ادخل غير لما في ناس طلبت مني كدة خصوصا ان علي كان داخل الجيش وهما شافو اني ادخل لانهم شافو اني هفيد فالمكان ده

وليه كنت واثق انك هتنجح مع ان كنت مرفوض من بعض الناس؟

الناس الي انا كنت مرفوض منها دي قليلة ومش اغلبية ممكن بيتكلمو كتير بس مش بيأثرو كتير مع احترامي ليهم كلهم وانت واحدة منهم بس لازم تفهمي اني كنت واثق لان
من طلب الي شئ اعين عليه ومن طلب شئ اوكل اليه
فانا الناس هي اللي طلبتني وخلتني اكلم وليد واتفق معاه وبعدين دي انتخابات وانا الحمد لله كنت مستعدلها بالفعل مش بالقول
يعني كان في ناس عمالة تتكلم مش فالمكتب اصلا وملهاش استمارة وانا سمعت وسكت ورضتش ارد عليهم

بس علي فكرة انا قبل الانتخابات بيوم كنت قاعد مع مجموعة كبيرة من الشباب وقلتلهم بالحرف الواحد انا كسبت خسرت فانا كسبتكم انتم لانكم ناس محترمة جدا
فايه اللي يخلي الشباب معايا يعملي فرق عمل ليا ويتكلمو عني ويعملولي دعاية ويستغلو اي معسكر او تجمع ويدعولي غير انهم احترموني وده المكسب الكبير مش مكتب ولا اي حاجة تانية

فالحمد لله اني كسبت اكبر حاجة وهي الاخوة واحترام الاخرين
وكويس اني ما بقتش مقرر المكتب لاني لما فكرت قلت لنفسي انا مش هفرض نفسي علي حد ومتفرقش معايا المقرر قد ما بفرق اني محدش يزعل مني
والحمد لله كل اللي توقعته حصل وعلشان كدة كنت دايما بقولك انك احسن حاجة عملتيهالي انك وقفتي ادامي فالانتخابات بجد الف شكر ليكي

وقدر الله ومشاء فعل

وايه رايك فى شغل وليد؟

بس من غير زعل لان انا عارف ان كلامي الناس بتفهمه غلط وبتزعل
بصراحة وليد عاوز يعمل حاجة بس لسة قدامه كتي لانه لسة مش عارف يتعامل ازاي مع الناس كويس ولسة شغله لحد دلوقتي ضعيف
ولسة وليد ما عملش حاجة
وانا مستني منه يعمل حاجة حلوة ولا فكرة حلوة لان انا عارف كويس انه عاوز يشتغل
بس قبل ما يشتغل لازم يظبط علاقته وطريقته مع الناس لان في ناس زعلانة منه وناس بتشتغل بس علشان هي بتحب المكتب
ولسة بدري علي وليد بس ياريت كلنا نبقي جنبه ونخلينا معاه لحد ما يظبط علاقته مع الناس ويكون قائد بجد لان ده دورنا ودور المكتب

من المثل الاعلى ليك؟

طبعا الرسول

بس بعد الرسول
انا بحب مصطفي كامل جدا جدا
وبحب صفات حلوة في ناس كتير
علي سبيل المثال
الاستاذ محمود مراد
الكتور طارق عمارة
شريف عبد الطيف
امينة عبد الفتاح
جهاد البلقاسي
هيام الطباخ

مش اقصد الترتيب

بس بجد الناس اتعلمت منها حاجات كتير وبيعجوني في حاجات كتير
اتمني اني اخد الصفات الحلوة من كل واحد فيهم لانهم كوكتيل جامد
انشاء الله اقدر اخد منهم الصفات الحلوة اللي فيهم

وكل واحد مهم بيختلف عن التني او بيتفق معاه في حاجات حلوة كتير
وفيهم ناس لسة عارفها من قريب جدا

احمد عايز يكون ايه؟

احمد عاوز يكون علي المدي القريب شغال يف مجال رعياة الشباب يعني مع شباب في اي مكان لان يبحب الشباب والشغل معاهم

وعاوز في المدي المتوسط يعني كمان 8 الي 10 سنين اكون بقيت قائد كبير بيأثر في اللي حوليه علشان انزل معاهم اعمل حاجة حلوة للبلد حتي لو وصلت لكنس الشوارع بس اكون قدوة لشباب كتيييييييييييييييييييييييييييييييييييييييييييير علشان يساعدوني بكل حب في كل ما هو خير
سواء كنت في مجلس الشعب او في الحزب او مجلس محلي او حتي وزير بس المهم اني اخدم البلدي دي

وعاوز علطول اكون محبوب واكسب ثقة واحترام الاخرين
ولما بصلي دايما بدعي الله اما حبب خلقك فيا فادعولي يارب

اة وايه رايك فى المعونه ههههههههههههههه؟

المعونة اي المذلة ام المعونة يعني الهبة

بصي يا منة
من يملك قوت يومه يملك قراره ومن لايملك قوت يومه لايملك قراره

اكيد كدة وضحت

وزى ما سالت وليد لو انت رئيس الجمهوريه تحكم بالقران ولا بالدستور؟

القران هو الدستور يا منة لان القران هو المصدر الاساسي للتشريع بس ممكن يكون محتاج شوية تعديلات فهعدلها
بس انا مش بتمني اكون رئيس جمهورية
لانها مسئولية كبيرة جدا وانا اخاف اني حد ممكن يتظلم في لحظة يدعي عليا فربنا يستجاب له وادخل جهنم
وفاكرة مقولة سيدنا عمر

يارب يا منة اكون جاوبت علي كل اتسئلتك ممستني لو عاوزة اي تعليق منك او اي سؤال تاني
ويارب محدش يزعل مني

لا عجبتى اجاباتك فيها عقل وعارف توصل الى عايز توصله
بس احلى حاجه رايك فى المعونه يعنى كدة هتبقى معايه يوم الاتنين ان شاء الله
بس القران مش هو الدستور يا احمد

ماشي يا منة الحمد لله اني حصلت علي شهادتك دي بس برده انا لسة مستني منك اسئلة كتير

ومتخافيش انا دايما مع الحق

وانا قلت ان القران هو المصدر الاساسي للتشريع وكمان قلت اني في حاجات فالدستور هغيرها

بصراحة وليد عاوز يعمل حاجة بس لسة قدامه كتي لانه لسة مش عارف يتعامل ازاي مع الناس كويس ولسة شغله لحد دلوقتي ضعيف
ولسة وليد ما عملش حاجة
وانا مستني منه يعمل حاجة حلوة ولا فكرة حلوة لان انا عارف كويس انه عاوز يشتغل
بس قبل ما يشتغل لازم يظبط علاقته وطريقته مع الناس لان في ناس زعلانة منه وناس بتشتغل بس علشان هي بتحب المكتب
ولسة بدري علي وليد بس ياريت كلنا نبقي جنبه ونخلينا معاه لحد ما يظبط علاقته مع الناس ويكون قائد بجد لان ده دورنا ودور المكتب

اشكرك كتير يا حمد علي الكلام ده بس احب اقولك ان الحمدلله كل الناس بتحبني وعلاقتي بيها كويسة معدا عدد قليل وده في اطار العلاقات الشخصية ولكن هما يردون ان يكون الخلاف في العمل ايضا وسبب الخلاف الاخر بيني وبينهم انني لا احب الهزار وقت العمل وعندي الجد جد وده بيزعل ناس مني اوك دي حاجة تاني حاجة ان في ناس بتشتغل في المكتب مش حب في المكتب بس لأسباب اخر الله اعلم بيها امل الشغل دي فا اللي معايا مش مديني فرصة للاي عاوز اعمله بس انشاء الله مع بداية الترم الثاني هيكون في تظام تاني خالص وبجد راي يحترم وله التقدير والاحترام من اخ اكبر مني




اما عن الاسئلة ليك يا احمد



احب اعرف ان انا كنت اخت راي الناس وقاللوي اترشح انت علي المقرر العام وكنت اخت راي الاستاذ محمود وكان موافق وبعدين انت قالت ان الاستاذ محمود والناس القدامه هم اللي قاللوك اترشح صح وبعدين الاستاذ محمود قال انه مقلش حاجة دي اول نقطة؟


لية احمد الرميلي متمسك بناس موجودة معانا علي الورق بس ؟




احمد عندك حب الظهور دائما ؟ جاوب بنعم ام لا




عاوز اعرف منك اية اللي كان في حياتك بالصدفة ؟ واية اكتر حاجة بتكرها واكتر حاجة بتحبها ؟


وعاوز اعرف هل احمد احيانا يكون استغللي نعم ام لا ؟


شكر ليك يا احمد

الف شكر يا وليد علي كلامك وزانك تقبلت كلامي بس انا قلت كلام انا واثق منه وعارف انا بقول ايه كويس جدا وانا بقولك كدة لانك المفروض انك اللي تكون عندك المبادرة وتصفي اللي جواك مع الناس دي ويا وليد تاني انا عارف انا بقول ايه كويس جدا جدا وبقولك الكلام ده علشان انا بحبك ومش عاوز حد يزعل منك بس لازم تعرف كمان اني في ناس قلتلي بالحرف الواحد انا كرهت اجي المكتب فده عيب فينا قبل ما يكون عيب فيه هو وبعدين انت معايا ان الناس مش مسعداك انك تعمل حاجة بس لازم تعرفغ ان انا الناس كانت اولي تقف في وشي انا بس اللي عاوز يشتغل بيشتغل ولو لوحده والناس اللي بتحب الشغل كتير جدا

انا عارف ان ممكن كلامي ده يزعلك ويزعل ناس تانية بس لو حتي زعلت مني يوم او اكتر بس هتكسب احترام الاخرين وهيجي اليوم اللي تعرف اني كنت فيه علي حق

احب اعرف ان انا كنت اخت راي الناس وقاللوي اترشح انت علي المقرر العام وكنت اخت راي الاستاذ محمود وكان موافق وبعدين انت قالت ان الاستاذ محمود والناس القدامه هم اللي قاللوك اترشح صح وبعدين الاستاذ محمود قال انه مقلش حاجة دي اول نقطة؟

طيب بالنسبة للنقطة دي انا عاوز اعرف فين السؤال وبعدين انت عارف كويس اني لما جيت اترشح كلمكتك انت الاول وقلتلك واتفقنا علي كل حاجة سوا وبعدين لما جه استاذ محمود ورفض وكنت متمسك بحقي او كنت هطلع برة خالص انت قولتلي انا عاوز معايا قلتلك حاضر يا وليد ومردتش اسيبك واقف لوحدك وانا اللي قررت اني متمسكش بحقي واني اتنازل ليك انت واجي المساعد وده برده علشان انا مينفعش اسيبك لوحدك يا وليد لاننا من الاول واحنا واحد وانا الحمد لله لحد دلوقتي موجود وشغال لاني بحب الشغل مش سايبك تغرق ولا حاجة بس انا الحمد لله راضي عن شغلي فالمكتب وانت قلتلي ماشي انزل انت وبعدين اقري كلامي كويس لاني كتبت كل كلمة بصدق وامانة

لية احمد الرميلي متمسك بناس موجودة معانا علي الورق بس ؟


زي مين يا وليد انا مش متمسك بحد ولو انت عندك مثل قولي عليه يمكن انا ناسي وانت عارف كويس ان مفيش معسكر بيجي واطلب كتابة اسم مش بيحضر


احمد عندك حب الظهور دائما ؟ جاوب بنعم ام لا


لا
والحمد لله كدليل اني مثلا مش بجي اقعد عالمنصة علشان ابقي قدام الناس واحمد الرميلي طول عمره بيشتغل ومن شغله الناس هي اللي بتيجي تتمني انها تتعرف عليه ولا بفرض نفسي عن حد وده لاني مقتنع باني مدخلش لحد غصب عنه
ولو انت شايف عندي حب الظهور قولي دليل او مثل



عاوز اعرف منك اية اللي كان في حياتك بالصدفة ؟ واية اكتر حاجة بتكرها واكتر حاجة بتحبها ؟



ممكن دخولي لحركة سوزان مبارك مكنتش مخطط لها لانها كانت حاجة جديدة

اكتر حاجة بكرهها
الظلم بكل انواعه

اكتر حاجة بحبها اني اساعد محتاج واني اشوف اصحابي بمنتهي السعادة
وده في كل حاجة

وعاوز اعرف هل احمد احيانا يكون استغللي نعم ام لا ؟

لا دي حاجة انا بكرهها لان ده يعتبر ضعف اني استغل ضعف حد وازله علشان احصلي علي اي شئ

ومستني بقيت اسئلتك يا وليد

ومستني باقي باقي اسئلة الشباب

حبيب قلبى منور يباشا انا بقا عايز اعرف ع السريع كدا
مين اكتر حد احمد بيحبة
مين اكتر حد احمد بيكرة

اللى مش عاجبك ف المكتب اية
نفسك تعمل اية ف المكتب

اية رايك فياااااااا ههههههههههه رخامة بقا

اية الصفة اللى انتا عايزها تتغير فيا بعيدا عن الهزار

اية رايك ف شباب المكتب
اية رايك ف شريف هيام امينة جهاد البلقاسى

اية اصعب المواقف اللى قابلك فى حايتك من مواقف صعبة جدا جدا

حبيب قلبى منور يباشا انا بقا عايز اعرف ع السريع كدا

ده نور الكهرباء يا حداد ومنقول عبر الشاشة

وانشاء الله اجاوبك علي كل اسألتك

مين اكتر حد احمد بيحبة
مين اكتر حد احمد بيكرة

اكتر حد احمد بيحبه فالمكتب الاستاذ محمود مراد

اكتر حد بكرهه مفيش لان مش بحب الكره خالص ممكن ازعل بس مش بعرف اكره حد

اللى مش عاجبك ف المكتب اية

اللي مش عاجبني فالمكتب ان في ناس بتيجي علشان رحلات بس وفي ناس بتتكلم كتير عالفاضي وفي شوية شلل وعشيرات بس دي الحمد لله مش موجودة قوي وان المكتب كمكان مش هو المكان اللي يليق بينا اقصدج القاعة الداخلية للاجتماعات بس الحمد لله انها موجودة وان المكتب مبقاش زي الاول ومش شغال كويس يعين فين المشروعات معدش في زي زمان شغل تمام

نفسك تعمل اية ف المكتب

نفسي اعمل حاجات كتير قوي
اولها ان اخلي الكل يحب بعضه ونبقي اخوات كلنا مع بعض ونخاف علي بعض والحمد لله دي بقت موجودة بيننا وانت شايف كدة بنفسك ممكن في ناس بتحاول توقع بس شوية شوية مش هيبقو موجدودين
نفسي كمان اني اعلم كل اللي اتعلمته في حياتي للشباب
نفسي اني اعد شاب بيفهم في كل حاجة سياسي واقتصادي وفني ورياضي وكل حاجة ممكن تقابله في حياته مش شرط المجال الثقافي وشغل المكتب بس ولكن كمان عاوزه يتعلم كل حاجة وعاوز اعلمه كل اللي انا اتعلمته من ناس كتير في حياتي
نفسي نكون احسن شباب واحسن مكتب نفسي نعمل مشروعات كتير
نفسي اظبط المكتب من جوة
نفسي نفضل مع بعض علطول حتي بعد ما نعدي السن وده ممكن من خلال الجمعية اللي قلتلكم عليها
نفسي نكون اقوي جهة شبابية في كفر الشيخ
ونفسي اني اكمل مسيرة عظماء قبلي كتير واكون احسن منهم كمان في اني اخلي مكتب كفر الشيخ احسن مكتب في الجمهورية
وبداتها بالحب وهنهيها بالحب والاحترام هنقدر نعمل كل ده انشاء الله

اية رايك فياااااااا ههههههههههه رخامة بقا

ورخامة ليه بس يا حداد ولا يهمك

الحداد طيب جدا ولذيذ وزي العسل ودمه خفيف
بس محتاج اكتر انمه يفصل بين الجد والهزار

انت شخص طموح لك اهداف عاوز تحققها ولما بتحط حاجة في دماغك بتعملها
وشايف انك بتحاول بكل جهد انك توصل لاهدافك بطرق شريفة

عصبي شوية ولما بتتربس بتتربس
يعني لما بتقفل دماغك بيبقي خلاص ولكن انت شوية وبتهدي علطول وبتسمع

وفالنهاية بجد انت شخص طيب وانا كان حظي حلو اني عرفتك وتمني نفضل مع بعض علطول لان بجد شخص طيب ولذيذ وعندك طموح

واتمني ايضا انك تكمل اللي بدأت فيه انك تتغير علشان تبقي احسن لاني اتمني اني اشوفك من احسن الناس فالكون انت وطارق وكل الشباب اللي انا بحبها فيارب بجد توصل لده

اية الصفة اللى انتا عايزها تتغير فيا بعيدا عن الهزار

انك بس تدي فرصة اكب لاي حد بيكلمك انه يعبر عن وجهة نظره خصوصا في موضوع نقاش
وشيل القفل المصدي هههههههههههه طبعا بهزر بس عاوزك تسمع اكتر وانت بتتناقش لانك فالاخر برده بتقتنع
وطبعا انت فاهمني وفاكر المواقف

وكمان انك متبقاش ساكت والاحترام زيادة قوي لما .............

اية رايك ف شباب المكتب

شباب المكتب شباب محترم والحمد لله ان الكتير منهم بيحبو بعض وبينهم احترام متبادل ان لم يكن الجميع وكمان الميزة اللي فالمكتب دي ان في شخص عارف يجمع الناس حوليه ومفيش احزاب زشلل كتيرة داخل المكتب زي ما في في اماكن تانية والشخص ده طبعا الاستاذ محمود مراد
شباب المكتب جواهم طاقة كبيرة عاوزين يطلعوها بس كل واحد جواه طاقة معينة وانا انشاء الله بصفتي اخصائي اجتماعي هخلي كل واحد يطلع اللي جواه
وفي شباب كتير عاوزة تعمل حاجة وبتيجي في غير المواعيد حباً في المكتب زيكم كدة
وطبعا في فئة قليلة بتيجي علشان المعسكرات بس ودي قليلين بس علي مين هيشتغلو برده
وبجد انا اكتر حاجة كسبتها من المكتب ده شبابه لانهم ناس محترمين جدا وجدعان قوي

اية رايك ف شريف هيام امينة جهاد البلقاسى

يالهوي عليك وهل لي راي في اساتذة من اساتذة كفر الشيخ والعمل الشبابي والعام ومن اكتر الشخصيات المحترمة اللي قابلتها
ومهما اتكلمت عنهم مش هقدر اوفيهم حقهم

شريف
شخص طموح مثقف عنده قدرة علي الاقناع من الشخصيات المحترمة اللي قابلتها في حياتي عوز يعمل حاجات كتير وبجد اتعلمت منه كتير ولسة هتعلم منه كمان انشاء الله ومن اول الناس اللي قابلتني فالحزب بعد العودة من جديد وكان من الناس اللي انا اتنعلمت منهم كتير ودايما كان بيشجعني ويدفعني وبيثق فيا جدا علشان كدة انا كنت بكسب الثقة في نفسي وواحد من الناس اللي دايما بيتمنولي الخير واللي بثق في ارائهم وبحب اخد ارائهم دايما في حاجات كتير ودايما عنده معلومات كبيرة في كل حاجة وانما الظروف مبهدلاه شوية ولكنه مش بيعرف يياس ودايما بيحاول وبيعافر علشان يوصل للي هو عاوزه وممكن من الناس اللي بحس بالامان معاهم
هيام الطباخ
استاذتي
عرفتها قريب جدا بالتحديد في 4 /8 واول مرة اتكلم معاها كان 5/ 8 / 2009
وبعدين لول مرة اشتغل فيها ورشة عمل في الحركة كانت معاها وكان لها دور كبير في اكسب الثقة لاني كنت داخل علي محموعة جديدة ومش واخد عليهم ولا اعرف اسمائهو ولسة اول مرة اشتغل ولكن هي كمان قدمتني وخلتيني اتوتر اكتر بس سريعا ما اكتسبت الثقة من جلوسها في الورشة معايا من نظرة عنيها وتشجيعها ليا لحد ما هي فالاخر قالتلي انت كنت ممتاز بدات خايف بس ثقتك وصلت لاعلي معدل في الاخر وكنت بجد ممتاز جدافعلشان كدة انا بقول انها من النسا اللي كانت ليهم بداية معايا في شئ ما ومش هنسي الموقف ده ليها لاني اتعلمت منها حاجات
وطبعا بداية اي انسان عيل مجموعة متجانسة بتكون صعبة بس هيام ادتني الثقة دي
بعديا عن الموقف ده
فهيام الطباخ شخصية محترمة جدا طيبة بشوشة حتي لو جواها ايه مش بتنسي حاجة ومش بتتاخر علي حد في طلب بتتمني الخير للغير جدعة
يعني من الاخر بنت بلد

الدور علي امينة بقي
امينة عبد الفتاح
ليها برده دور في حياتي لاني نضمامي لحركة سوزان مبارك كان هي اللي ليها دور فيه واثر فيا النضمام ده كفاية عالاقل اني قابلت ناس محترمة فيه غير انه نمي عندي حاجات كتير حلوة ويكفي انها لمجرد انها سمعت عني انها اتمسكت بيا معاها في مجموعة عمل الحركة من غير اختبارات فكان لازم اني ارد ليها ثقتها دي ويارب اكون قدرت ارد جزء منها
وامينة من عيلة طيبة كلهم ناس طيبة علشان كدة هي كمان طيبة جدا مع ان ابوها احسن حد فالعيلة دي بس يالا مش مهم هي كمان بيجد شخصية محترمة جدا وطيبة جدا طموحة مرت بمواقف كتير مش حلوة ولكن كل مرة بتطلع اقوي منها اتعلمت منها حاجات ولسة برده هتعلم منها
بتحب تاخد راي الكل مش بتحب تنفرد بالراي وودودة وطيبة وبنت حلال والله وياريت اسنعلها اغنية مصر السفينة في ايدين امينة

جهاد البلقاسي
اختي الصغيرة الكبيرة
وهي فهماني فالجملة دي
طبعا ما تختلفش عن الباقي كتير
شخصية محترمة جدا بيبدا احترامها من احترامها لكلمتها ومواعيدها جدا جدا
عرفتها قريب خالص برده بالتحديد برده في 4 /8
ولكن قربت منها اكتر واتكملت معاها فالمكتب واكتر واكتر في لقاء وزير الشباب 6 /8
فهي شخصية مثقفة جدا دايما بتحب الاطلاع يعني اقدر اقول بتقرا كل اسبوع كتاب او ممكن اكتر بتتطلع علي كل ما هو جديد علطول بتحاول تنمي نفسها اكتر واكتر بتعمل uptade لنفسها ولمعلوماتها علطول بتجبر الجمنيع علي احترامها بنت بمائة رجل (جوالة ) بتحب تفكر في كل حاجة وتحسبها
وبرده اتعلمت منها ولسة هتعلم منها

وطبعا انا مهما اتكلمت عن الناس دي فانا محتاج ساعات علشان اقدر اتكلم عن عمالقة العمل الشبابي والعام في كفر الشيخ الان وانشاء الله يدوب المعرف بيننا واتعلم منهم اكتر واكتر
وربنا يوفقهم في حياتهم يارب
ونسيت اقول انهم من الناس اللي بتحب شغلها جدا
بتحاول تتعلم من كل حد تقابله حاجة

اية اصعب المواقف اللى قابلك فى حايتك من مواقف صعبة جدا جدا

اصعب المواقف لما عملت مشكلة كبيرة فالمعهد واقرب الناس اتخلو عني وكنت هتفصل فيها سنتين بس الحمد لله
وةكمان اصعب المواقف اللي انا بحسها صعبة عليا هي ان حد يظلمني جدا خصوصا اني اكون بعزه او اني اشوف او احس ان حد محتاجلي وانا مش قادر اكون معاه

السلام عليكم ورحمة اللة وبركاتة
اذيك يا احمد وكل سنة وانت طيب
ومبروك عليك كرسى الاعتراف ندخل ع الاسئلة بقا.........

اولا ياريتك ماسألتي وبتقوليلي ابقي براحة عليا طيب ماشي

عادي خالص برده هجاوب
ههههههههههههه

انا كويس الحمد لله وكل سنة وانت طيبة
وعقبالك كدة علي كرسي الاعتراف
ندخل فالمهم بقي

بديتاً عايزة اعرف بطاقة احمد الشخصية...
اسمـــك......
عمــرك........
مؤهلك التعليمى.....
عمــــلك الخاص.....
هوايتك.......
ايجابياتك.....
سلبياتك....

وعاوزة تعرفيها ليه عندك عروسة ليا ولا ايه عالعم وم ماشي بس انا مش بفكر فالجواز دلوقتي

اسمـــك...... احمد محمد محمد الرميلي
عمــرك........ 22 وشوية كدة
مؤهلك التعليمى..... بكالريوس خدمة اجتماعية 2008
عمــــلك الخاص..... لسة مفصول من اخصائي اجتماعي بمدرسة وعندنا مكتب بديرها مع والدي وطالب بالفرقة الثانية بالدراسات العيا بالمعهد لنيل درجة دبلومة في رعاية الفئات الخاصة
هوايتك....... الانشطة الاجتماعية والتطوعية والسياسية بصفة عامة والعمل مع الشباب بصفة خاصة
ايجابياتك..... طبعا محدش بيشوف ايجابياته وسلبياته بس انا بحس اني طموح مثابر يعني مش بسيب حقي بسهولة بجيد فن القيادة وفي ناس بتقول عليا مثقف بس الله اعلم
والحمد لله اني بعرف ازاي اكسب احترام الاخرين ليا بحب اخدم الناس دون انتظار المقابل وتكفيني كلمة شكرا
سلبياتك ساعات بيأس في نص الشغل بس برجع واكمله تاني وحلو وده لو في مشكلة او قضية شغال فيها
مش بحب القراءة الكتير ولا الكتابة وخطي وحش ههههههههه
اني لما بزعل بشيل جوايا ودي مش عارف ميزة ولا عيب بس دي بتتعبني انا وبتأثر عليا صحيا

وطبعا الله ورسوله اعلم وانا مقدرش اتكلم عن نفسي ولكن اسيبكم انت او اي حد تقوليلي ايه اللي فيا

2_كل انسان منا اكيد بيمر ببعض المواقف سواء كان مؤلم او طريف فلو سمحت تذكرنا بعض منها ,,,واية اللى اتعلمتة من المواقف دى؟؟

مريت بموقف اني اتكلمت عن دكتور مش حلو مع واحد وطلع اخوه
وعملتلي مشكلة كبيرة واتعلمت منها اني متكلمش قدام حد انا معرفوش او اعرفه عن حد خالص
وعرفت من الموقف ده برده مين اصحابي الجد ومين الاونطة
وكان الحلو فيه اني كسبت اصحاب بجد وبنات اجدع من الرجالة

ومواقف تانية اني كان في ناس كتير بتحب تيجي تاخد رايي في حاجات كتير وده حاجة حلوة لان دي تعتبر ثقة

وشاركت واحد في شغل ونصب عليا
واتعلمت منه اني اخد كل الاحطياتات قبل كل حاجة واصحاب وحبايب برة بس الشغل شغل
وكمان ممكن اخرها وده حلو لما رئيس قسم رعاية الشباب في حفل تكريم للفرق الرياضية اللي كسبت فالاسر بيرحب بيهوم وبيشكرهم بيشكرني شكر خاص مع اني مش من المكرمين بس شكرني وقالهم انا اتمني انكم كلكم تبقي زي احمد ده في يوم من الايام وانا بتمني ابني يبقي زيه وكنت بتمني اني يجي شغل فالقسم هنا علشان اعين احمد معايا وشكرني جامد قدامهم ومكنش مطلوب منه اني يشكرني دي بجد حاجة فرحتني وعرفتني قد ايه الناس بتحترمني وبتحبي حتي لسة النهاردة كان في مشروع للاسرة مش موافقين عليه وقالولي روح انت كلمهم هما بيحبوك ولما رحت وافقم عليه فده بيديني ثقة كبيرة وبيحسسني اني الحمد لله عملت حاجة حلوة في حياتي وساذكر دايما بالخير

وكمان لما كنت لسة في 3 معهد وكنت بعامل كل البنات زي اخواتي ناس كتير من الشباب الفاشل قالولي انت غلطان لازم تحور والكلام الفاضي ده وسيبتهم وفضلت علي مبدأي والحمد لله مرت الايام ولسة الناس دي والبنات بتحترمني جدا ولسة بيذكروني بالخير ونسو الشباب الفاشل ده وواتجوزو وخلفو ولسة بيفتكروني بالخير

ودي اتعلمت منها اني احترم نفسي الاول ففالاخر كل الناس هتحترمني

وفي مواقف كتير بس طويلة وانا مش فاكر منها كتير بس في حاجة غريبة اتعلمتها من خلال كل التجارب دي اني ابقي اسي وافكر اكتر بالعقل مش بالقلب لاني اتظلمت كتير وكتير اتقال عني كلام مقلتهوش من نالس كانت قريبة مني لناس تانية اقرب ليا منهم وصدقوها
وفي حياتي اتعلمت حاجات كتير من ناس كتير

3_ما هى الاشياء التى ندمت عليها بحياتك؟؟

لما هزرت مع شخص ما بطريقة مش حلوة فصغرت انا في نظر نفسي بس الحمد لله برده اني لسة كبير في نظرهم وهما بيفتكروني بالخير
ومش ندم بس تأخر اني اخد دورات كتير في مجال التنمية البشرية واعداد القيادات بس الحمد لله
وانا مش بندم علي الحاجات دي لان الحمد لله ربنا كاتب لكل واحد مصيره
واعلم يا بني ان الامة لو اجتمعت علي ...............

4_ما هى حكمتك المفضلة ف الحياة؟؟ وهل لأحلامك حدود؟؟

حكمتي المفضلة
اولا من حبنا حبناه وصار متعنا متاعه ومن كرهنا كرهناه وحرم علينا اجتماعه
وحكمتي الاخري عامل الناس بالحسني حتي لمن اساء اليك فانك تعامل الله في خلقه
وفي مقولة بحبها واتعلمتها ان القائد الناجح هو من يستطيع ان يصنع قيادات خلفه

ما هى نظرتك للماضى ,,الحاضر,, المستقبل؟؟؟

ياريت توضحي علي المستوي الشخصي ولا القومي ولا ايه بالظبط

_اذا واجهتك مشكلة لمن تلجأ؟؟

بحاول الاول اني احلها بنفسي لان مش بحب ازعج حد معايا وبعدين مفيش حد معين بس علي حسب المشكلة دي في ايه بالظبط
بس عموما هو كان في 2 بحكيلهم وبحب اتكلم معاهم وانا زهقان او مخنوق
وطبعا فالاول والاخر بلجا الي الله

لو قابلتك شخصية من دول هتتعامل معاها ازاى...

*انسان عصبى...... هتكلم معاه بالراحة واسيبه لحد ما يهدي ويبقي هادي وبعدين اتكلم معاه في الموضوع اللي انا عاوزه واكيد لازم اختار الوقت المناسب في ان تكون حاجة مفرحاه او اشوف هو بيحب ايه واعملهوله يعني لو اهلاوي اكلمه والاهلي كسبان مش خسران ولو زملكاوي ممكن اكلمه دلوقتي علشان الحمد لله الزمالك رجع يكسب ههههههههه
*انسان مغرور ......
انسان مغرور لازم احسسه بقيمته وان مفيش حد بعده فالكون واتكلم معاه علي انه كبير بس بتخنق منهم فالاخر لان من تواضع لله رفعه
*انسان متعصب لرأية.....
هكون معاه اتوقراطي يعني ادخله من اقتناعه برايه واحاول اغير فيه بالتاكيد علي الايجابيات واني اخد السلبيات واحولهاه لايجابيات واني اتناقش معاه كتير علشان فالاخر اقنعه برايي انا من خلال اني اخد كلامه هو واحوله لكلام مش مظبوط وان احتملاته مش تمام وفيها مشاكل واجيب له تجارب سابقة مش تمام ولازم فالاخر هنتفق بس لازم انا كمان مكنش متعصب لرأيي واكون مرن وقابلتني من دي حالات كتير ممكن في منها في شغلي كمدرب
مثال في حد بيقول مش بحب مصر
فكنت برد واقول بتحب والدك ووالدتك وكنت بخليه يحب مصر من حبه لوالده ووالدته وافتكري كدة فيلم مافيا وكلام حسين فهمي فيه

5_ماذا يعنى مكتب شباب المستقبل بالنسبة لك؟؟وما الفائدة التى جنيتها منة ؟؟

مكتب شباب المستقبل يعني لي المكان اللي بستفيد منه في الفكر والثقافة
يعني لي اخواتي
يعني لي اسرتي
يعني لي البيت اللي بيضم الاخوات والحب بينهم مع اب عظيم وهو الاستاذ محمود مراد
مكتب شباب المستقبل هو مكملة من عملي وهواياتي في مجال العمل الشبابي والعام
استفدت منه حاجات حلوة كتير منها اني كسبت اخوات كتير محترمين وعرفت ناس كتير محترمين جدا جدا جدا
واني اكون تابع وانا كنت مصمم اني اتعلم اني اكون تابع
اتعلمت منه
واتعلمت منه امتي اتكلم وامتي اقف واني امسك ورقة وقلم واتكلم فالاخر
واني مش اخاف وانا بلقي كلمة
واني اقف رقدام اي حد واتكلم بس بطريقة زوق ومحترمة حي لو بجرح
دي اكتر الحاجات اللي تعلمتها من المكتب
وفي حاجات كنت متعلمها من برة كتير وبالتحديد فالمعهد وفي ممارسة الانشطة المختلفة الي المكتب اكدلي عليها وبدات اني اعلم الناس اللي فالمكتب اللي انا اتعلمته وممكن انت شوفتين مثلا واحنا شغالين في مجلات الحائط بحاول انقل اللي انا اتعلمته لان ده دوري

6_لو طُلب من "احمد الروميلى" وضع عدة نقاط او اقتراحات للرقى بالمكتب فمـــــــــــــا هى؟؟

اولا اني لازم يكون في كل شهر حفل تعارف بين اعضاء المكتب لن في ناس متعرفش بعضها ولازم ابدا بزرع الحب والاخوة في روح الاعضاء علشان دي بداية الشغل الجاد

* ان محدش يطلع رحلات او معسكرا غير اللي شغالين فالمكتب
* اني اكرم الناس اللي بتشتغل كل شهر ولو بهدية بسيطة علشا الروح التانفسية وان اللي بيشتغل يحس بقيمة شغله
* ان لازم الشاب اللي فالمكتب يتعلم كل حاجة فني ورياضي وثقافي وازاي ينظم اي حاجة وغيرها وغيرها يعني اطلعه فاهم كل حاجة عن المكتب
* تفعيل دور المكتب في خدمة المجتمع زي القوافل الطبية وحملات الدم والظافة والتشجير وغيرها اللي تخلي بلدنا احسن
* اني اظبط المكتب من جوة علشان لما حد يجي ميستغربش عليه وشكله

وفي حاجات تانية بس اولها هي الحب بين الاعضاء لان بالحب محدش هيقدر علينا
ووفري عليا وابقي اقري برنامجي الانتخابي اللي فالمكتب

7_كشاب مصرى اية رأيك ف حال الشباب بشكل عام ..وخصوصاً ف تقليدهم الأعمى للأشياء؟؟؟ وما هى النصيحة التى توجهها لشبــاب اليوم؟؟؟

حال الشباب في مصر مش زي زمان لا وجه للمقلانة بين الشباب زمان ودلوقتي
زمان كانت كل الحركات الوطنية في مصر بيقوم بيها طلاب الجامعة ودلوقتي الشباب قاعد عالقهاوي
زمان سليمان الحلبي ومعاه مجموعة من 4 طلاب جامعة وهو كان برده طاب قتلو كليبر علشان دنس الازهر الشريف
ودلوقتي الشباب بيقتل علشان ياخد فلوس يشتري بيها سم ومخدرات وقرف
زمان مصطفي كامل مات وهو عنده 34 سنة وهو بيدافع عن مصر ودلوقتي فين الشباب بيدافع عن البنت بتاعته

الشباب مش زي الاول خالص دلوقتي زي انتي ما بتقولي بيقلدو وخلاص وياريت بيقدلو حاجة حلوة بس بيقلد الفنان فلان لابس سلسلة يبقي البس زييه وغيره وغيره
بس طبعا ده مش كل الشباب

بس اللي انا اتمني اني اشوفه ان الشباب يكون لهم دور اكبر ويتخلو عن السلبية واللامبلاة اللي هما عايشين فيها دلوقتي دي وانهم يفكرو ممكن يعملو ايه لبلدهم بدل ما كل واحد قاعد مستني غيره يعمله هو
ويارب اشوف الشباب بترح تشتغل في اكتوبر او غيرها او غيرها وتدي طاقتها لبلاده بدل ما بيسافرو يتمرمطو برة ويتهانو ويرجعو زي ما راحو تاني

والنصيحة انا قلتها اني لازم الشباب يفكر اكتر هو عاوز يعمل ايه وازاي ويحاول يفيد بلده اكتر ويفيد نفسه واني افكر بالعقل مش بالعاطفة

8_هل ف رأيك ان العمليات الاستشهادية اللى بيقوم بيها البعض ف غزة او العراق او.....هى فعلاً تعنى استشهادية؟؟واللى بينفذها بيعتبر شهيد ...دا مع العلم ان العمليات دى بتقتل الكثير من العراقين او الفلسطينين وتصيب الامريكان خسائرهم بسيطة؟؟؟؟؟؟؟!!!!

العملية الاستشهادية تعني اني ادمر فالعدو مش في نفسي وبعدين انا بموت نفسي وبترجع عليا تاني من قوات الاحتلات فموت نفسي وشعبي مرتين ودي انا بعتبرها عمليات فدائية بمعني ان كل واحد وخداه الحماسة بيروح يستشهد من غير تفكير ولازم علشان يستشهد انه يفكر اكتر في المكان وعدد المستهدفين
وشفت ايام حر ب العراق كانت الصواريخ بتضرب بتصيب افراد وكانت بتسيب اماكن التجمعات
اما يعتبر شهيد او لا فدي مقدرش افتي فيها لانها عند الله

9_لو اجتمعت مع حكام العرب والمسلمين ف اجتمـــاع واحد ...هتقولهم ايــــة؟؟؟؟؟
هقولهم اننا المفروض امة واحدة ولازم نكون متفين بيننا وان لو في حد دلوقتي معاه فلوس او دولة غنية فدي مش دايمة بس احنا ربنا هيحاسبتا علي شعبنا ده واخواتنا اللي بيموتو في كل مكان واننا لازم نتجمع تاني من جديد علشان نكون قوة امة واحدة قلب رجل واحد
وهفكرهم بكلام سيدنا عمر وبعض الانبياء والرسل
واننا لازم نكون واحد في كل شئ تخيلو اننا بس استوردنا وصدرنا لبعض الغرب هيخسر قد ايه واحنا هنكسب اد ايه


وهقولهم واعتصمو بحبل الله جميعا .......................

السؤال ال1112222845634 والاخير اية رأيك ف الاسئلة دى وصاحبة الاسئلة بالمرة؟؟؟؟؟؟؟؟

بس خلاص كدا

وسورى بقا لو كنت طولت

ســـــــــــــــــلام

الاسئلة دي وراها حاجات كتير انت عاوزة تعرفيها وعرفتني انت اد ايه سهنة
وفكرتني بحاجات حلوة وحاجات مش حلوة واتعلمت منها حاجات
وفعلا الاسئلة دي مش اي اسئلة انت بتسألي كل سؤال ومستنية الاجابة علشان تفهمي الشخصية فعلا مش اسئلة وخلاص
انت كنت خدمة اجتماعية قبل كدة
ويارب اكون قدرا افيدك بالرد وانا مستني اعرف انت كونتي رأي ايه عني من خلال الاجابة

اما بالنسبة ليكي انت
فانا هوريكي وهطلع عينك بس لما يجي الدور عليكي
ههههههههههههه

طبعا بهزر وانا طول عمري بخاف من الناس الهادية دي واه منك ومن الواضح اني كان معايا حقي في فكرتي عنك
وانك من الناس المحترمة اللي انا عرفتها
وسلام
وخلاص ليه لو عندك حاجة تانية قوليها

وفرحان قوي يا لمياء ده انا قلت انك هتوتيني
عالعموم حمدلله عالسلامة

رتب هذه الكلمات على حسب اهميتها عندك المال - الحب - الصديق - المستقبل المهني - العائلة !!!!

الحب واقصد الحب بصفة عامة مش حب شخص لشخص بالمعني البسيط ولكن الحب بمفهومه البسيط
الصديق
المستقبل المهني
العائلة ولو تقصدي الجواز انا لو ابويا وامي فهي قبل الصديق
المال

- قرار اتخذته وتسرعت به ومن ثم ندمت عليه؟؟

بصي هو انا متعودتش اندم علي حاجة بس لازم اتعلم منها وهو مش قرار هو كان راي في حوار وقلته وكان يعيب في شخص ما وطلع انا بتكلم مع اخوه وانا مش عارف انه اخوه ومن ثم عملي مشكلة كبيرة كادت ان تفصلني من المعهد سنتين بس عدت الحمد لله
وومكن مش ندم برده بس لما اتنازل عن حاجة لحد بطوعي واختياري واللي اتنازله ده او سيبله حق يطنطط عليا او يتكبر عليا
وبعدين انا مقتنع بانه قل ما يصيبنا الا ما كتب الله لنا

لو الزمان عاد يوما ماالشي الذي ستفعله مره اخرى ومالشيء الذي لن تفعله مره اخرى ؟؟

ليت الزمان يعود يوما

مش هضيع وقتي في حاجات غير مفيدة ومش هغلط في حد امام حد معرفوش
وفي اشخاص مش هعرفها
وفي حاجات عملتها مش هعملها زعلت مني ناس
وهعمل
هشترك في جميع الانشطة الشبابية والعمل العام وهثقف نفسي اكتر واكتر واخد دورات اكتر


ةخلاص كدة يا لمياء ومستني منك باقي الاسئلة

اولا ميرسى ع الرد واكيد افدت بالرد اشكرك بجد

لبا شكر لفرد بيطلع عينه في كرسي الاعتراف

وبالنسبة للسؤال دا
ما هى نظرتك للماضى ,,الحاضر,, المستقبل؟؟؟

فهو ياريت ع المستويين الشخصى والقومى شايفهم ازاى........

بالنسبة ليا انا فالماضي اتعلمت منه كتير وكونت صداقات كتير والحاضر بتعلم منه اكتر وبكون صداقات اكتر وبعلم اللي اتعلمته للي عاوزين يتعلمو
انما المستقبل فانشاء الله هون قيادي كبير عنده القدرة علي جذب اعداد كبيرة من الشباب حوليه علشان نغير ونعمل حاجات حلوة كتير للبلد دي واكيد هتجوز واخلف بس ده بعد عمر طويل انشاء الله واكون اشتغلت ويارب اشتغلي في مجال الشباب ورعاية الشباب

اما القومي فمصر زمان مرت بظروف صعبة كتير اخرتها سنين كتير وكتير وخلتنا لسة من الدول متاخرة والسبب في ده الحروب اللي مصر مرت بيها من زماااااااااااان وكان اخرها 73 ويمكن كان لسة في بقايا الحر العالمية والالغام اللي فالصحراء

الحاضر عصر الولادة من جديد

ودي وجهة نظري المتواضعة وهي ان مصر بتبدا تعيد تنظيم نفسها وتشم نفسها شوية وبدات تعيد قوتها السياسية والاقتصادية ولسة في مجالات كتير مصر بتشتغل فيها الهدف منها انها تكون افضل ومثلا اخر حاجة عندنا المحطات النووية

المستقبل هيكون احلي للي فات وللاجيال اللي بعدنا كمان كل اللي احنا بنعمله دلوقتي واللي مصر بتعمله للاجيال اللي جاية زي المحطات النووية مش هتشتغل دلوقتي ولكنها هتفيد اللي جاي
توشكي لسة خيرها مطلعش ومش هيطلع غير بعد سنين وسنين للاجيال اللي لسة هتيجي
وشرق التفريعة برده لسة للي جاي
يعني مصر دلوقتي بتعمل مشروعات قومية كبيرة بتصرف عليها كتير ورمايها للزمن علشان ولادها اللي جايين بعد كدة
بالظبط زي الام اللي كل شوية بتشتري حاجة في جهاز بنتها وتقول علشان لما تكبر وتتجوز
فمصر مشروعاتها كتير وكبيرة ومش هتبان دلوقتي بس هتبان بعدين اكتر واكتر
وهتكون في يوم من الايام وده قريب جدا من الدول المتقدمة وعلشان كدة مصر عليها مؤامرات دلوقتي علشان تاثر عليها وعلي نموها الاقتصادي
ودورنا احنا اننا نصبر عليها ونساعدها ولو بالدعاء واننا نساعد باي حاجة نقدر عليها واولها اننا مثلا منجبش عيش زيادة عن احتياجاتنا مثلا وغيرها كتير وكتير

ومن خلال الاجابة فاللى انا شفتة ف شخصيتك.....
فهى شخصية ذكية,,, اجتماعية وودودة,,,تمتلك قدرة ع العطاء ,,,متحمسة وطموحة ف العمل,,,شخصية عقلانية ومتعايشة الواقع,,,اسلوب لبق ف الكلام حتى ف الاعتراض ع الاشياء ,,,قيادية بطبعها ,,,بجانب انها شخصية محترمة جدا .....

دا اللى انا شفتة بوجهة نظرى الصغيرة فاتمنى تتقبلة

ربنا يخليكي يا وعد ويارب اكون كدة فعلا واكون عند حسن ظن الجميع واثبت اني فعلا الكلام ده عليا انا كمان وكمان
وانا مغلطش لما قلت ان اسألتك دي وراها حاجات كتير وطبعا وجهة نظرك تحترم جدا ولازم احترمها واتقبلها لانها مش من اي حد بس ولكنها من انسانة محترمة كمان وانا سعيد بمعرفتها


وهتطلع عينى ليييييييية انا عملت اية ؟؟؟؟

ده انت غلبانة خالص يا سهنة بقي كل ده يطلع منك انت ماشي وبس علشان قعدتين اكتب كتير ومش عرفت انام

وطبعا انا بهزر والله وبراحتك خالص هو يعني انت بتسأليني كل يوم اسالي براحتك خالص خالص وانا هجاوب انشاء الله ولو علي مليون سؤال



وتقبل مرورى ع متصفحك للمرة الثانية و....و....


متقبل مرورك يا ستي بس بعد كدة هتدفعي فلوس انا مش بكتب ببلاش بس و...... و...... اكتبي اللي فالنقط ولا ده سؤال اكمل المفرض اجاوبه

هههههههههههههههههههههه

يالا سلا اهل الهوا عني ان كنت لا تعرفني

يا روميلي انت طبعا عرفني كويس انا هسالك شوية اساله مش كتيره

السؤال الاول : انت محدد لنفسك تتجوز امتي ؟
السؤال الثاني : انت اخر طموحاتك ايه ؟ يعني ممكن بعديها تقول انا كدا عملت كل حاجه ؟
السؤال الثالث : ايه الحاجه اللي لو انت ما عملتهاش في اليوم تحس ان ناقصك حاجه ؟
السؤال الرابع : حبيت كام واحده قبل كدا ؟؟ ولو ممكن اسماء اللي حبيتهم ؟؟؟ انا عارف ان السؤال دا محرج شويه ؟؟


بس كدا انا خلصت الاسئله بتاعتي وياريت ترد عليها من غير اعذار

يا روميلي انت طبعا عرفني كويس انا هسالك شوية اساله مش كتيره

السؤال الاول : انت محدد لنفسك تتجوز امتي ؟
السؤال الثاني : انت اخر طموحاتك ايه ؟ يعني ممكن بعديها تقول انا كدا عملت كل حاجه ؟
السؤال الثالث : ايه الحاجه اللي لو انت ما عملتهاش في اليوم تحس ان ناقصك حاجه ؟
السؤال الرابع : حبيت كام واحده قبل كدا ؟؟ ولو ممكن اسماء اللي حبيتهم ؟؟؟ انا عارف ان السؤال دا محرج شويه ؟؟


بس كدا انا خلصت الاسئله بتاعتي وياريت ترد عليها من غير اعذار

الاسئلة جميله بس الرد مش هيكون موجود علشان في حاجات مش هتتكلم فيها