البقاء لله والباقية في حياة كل مصري توفيت الي رحمة الله تعالي ....."الكهرباااااااااااااء "
,وذلك بعد صراع مع الحكومة عفوا صراع مع المرض استمر عدة اشهر وسيتم تشييع الجنازة قريبا جدا جداآآآآآآآآآآآآآآآآآه..آة ..آه
بيقولها كل مواطن مصري من قلبه الاهات دي
من الغلاء والرشاوي والفساد والدروس ...الخ الخ
وكمان جاءت الكهرباء عشان تزود همومه هم كبير تاني
من فترة كده تقريبا من 5-6 شهور والكهرباء تقريبا كل يوم بتقطع بالتناوب في مناطق الجمهورية كلها
ومن فترة استضافوا الوزير وقال رد رخم
سألوه ليه الكهرباء بتقطع؟؟؟... رد بكل بساطة بنريح الشبكات عشان مفيش وقود يشغل المحطات 
ينهار اسود"آسفة فى اللفظ"... بيقولك مفيش وقود ومن دلوقتي ماهو كان ممكن يلاقوا وقود لو بطلوا يصدروا الغاز لاسرائيل
وسيبك من كده كمان ده فيه مصايب جاية بس اقرأ الموضوع للاخر
طبعا احنا كلنا عارفين التقرير اللي بيقول ان مصر هينفذ منها الغاز سنة 2019 يعني بعد 9 سنين باذن الله
لما هو مش لاقي وقود دلوقتي امال بعد 9 سنين هيعمل ايه هيقطع الكهرباء بالاسبوع
وكمان الحمد لله غلوا سعر كيلو الكهرباء الظاهر عشان بتقطع
هو احنا عاوزنها تقطع وتبقي رخيصة كمان ده احنا طماعين اوي
تعالوا للاسخن بقي
النقطة اللي مفيش كائن حي في مصر اتكلم فيها خالص_
وهي ان نهر النيل هيقل ودول حوض النيل عاوزة تقطعه عننا وكل الكلام ده
طيب لما نهر النيل هيقل هيحصل ايه بقي ؟؟
اول واحد هيقولي المية هتقل وسعرها هيغلي برده
هقوله صح وايه كمان؟؟فكر كده يمكن تجيبها
لو مجبتهاش انا اقولك ايه كمان
كلنا نعرف طبعا ان النيل بيولد 3/4 الكهرباء التابعة لمصر
لما مياة النيل تقل !! يبقي اوتوماتيك الكهرباء بتاعته هتقل
يعني باذن الله اضمن لك بعد 5 سنين بالكتير ..... مصر تغرق في عصور الظلام الوسطي بمعني الكلمة....
وبالمناسبة عندنا كل يوم الكهرباء بتقطع حوالي 3-4 ساعات مع اني مش ساكنة في الجبل ولا في الصعيد الجواني
ونرجع للوزير تاني اللي كمل كلامه وقال ان محطات الكهرباء مش مستحملة الضغط اللي عليها ( يعني مفيش كهرباء تكفي كل الناس دي بمعني اصح) وسالوه لو فكرتوا تعملوا محطة طاقة نووية قالهم من5-9 سنين وعليكم خير ومن كام يوم قالوا انهم هينزلوا جدول لمواعيد قطع الكهرباء شوفتوا النظام بقي؟؟
وهكذا تلفظ الكهرباء انفاسها الاخيرة لتلحق بمن سبقوها من اخوتها واخوانها ومنهم(الديموقراطية-العدالةوالمساواة-الضمير)
واخيرا تصبحوا /تتمسوا علي خير وعلي شقة فيها كهرباء وغاز وعيش كمان اهم حاجة العيش عشان الازمة بتاعت اليومين الجايين
البقاااااااااااااااااااااء لله
